من انتم؟
لسة فاكر اول يوم في اول شغل ليا اكنه امبارح..كان في مصنع في العاشر من رمضان..اول يوم رحت والمفروض هقابل مديري..دخلت المكان اللي المفروض هيبقي مكان شغلي بعد كده..مكاني..كان بمثابة صدمة بالنسبة ليه..من ناحية كل حاجة..بس الاهم..كان صدمة حضارية.
دخلت لاقيت ورشة متهالكة ريحة الشحم و الزيت تعمي..الدهان واقع من علي الحيطة..دوشة الكومبريسور لا تطاق..مكنتش متخيل ازاي هشتغل هنا..المهم كان الفنيين متجمعين بيفطروا..مش عارف اعمل ايه ولا انيل ايه..لدرجة اني رحت اسألهم في وسط الفطار..رحت وانا مستجمع قواي بالعافية اني اروح اكلم جمع كبير كده من الطبقة ده اللي عمري ما اتعاملت معاها قبل كده..رحت اسألهم علي الباشمهندس احمد مدير الصيانة..قام من علي الفطار راجل كبير كده كان رئيس الفنيين..قعد يتكلم معايا لحد ما مديري جه..مكنتش عارف اتكلم معاه..ببساطة مش عارف..اول مرة اقعد او اتكلم مع حد “فني” الحالة دي فضلت معايا لمدة مش اقل من شهر ونص..يا دوب ابتسامة ساذجة في وش اي حد وخلاص..بعد كده بدأت اتأقلم..لان ده الحل الوحيد..بدأت نظرتي مع الوقت تتغير..خصوصا ان زميلي ماكانش بيعاني من اللي عندي ده خالص..وده جرأني شوية..بدات ابقي علي طبيعتي شوية و اتكلم و اهرج..و الناس تقولي اني دمي خفيف..اخف من باشمهندز رامز..بعد ما اكيد كنت بالنسبالهم عيل سمج و اتم.
لما اقربت للناس دي اكتشفت انهم مجرد ناس زينا..بطبيعة البيئة اكيد في اختلافات..بس في الاخر زينا..بيفكروا زينا..بيهرجوا و دمهم خفيف زينا..بل وكمان اجدع مننا.
كلمة شهامة ولاد البلد اللي بسمع عنها في الافلام دي..حسيت بيها لاول
مرة..لان دي مش في الناس اللي انا عايش وسطها واكيد مش فيا.
بل كمان كانوا محترمين اوي..اكتر من ناس كتير متعلمة..كان راجل كبير قد ابويا..يقوملي من علي الكرسي..و مينفعش يقولي حاجة غير يا باشمهندس..ولو عايز يديني نصيحة بيتأسف الف مرة..كنت بستغرب اوي..كانوا يتكسفوا يشتموا اول يقولوا لفظ خارج قدامنا احنا ولاد اول امبارح..واحنا لساننا ماكانش عليه اي رقيب.
الناس دي مين قال انهم اقل مننا؟!
الناس دي فيهم حاجات كتير احسن مننا..انسانيا
.
احنا ايه اللي مخلينا احسن منهم..ليه عندنا النظرة الطبقية دي انهم اقل مننا.المقياس ايه؟
فلوس؟ شهادة؟ لغة؟ المقياس ايه..
احنا جايز نكون احسن منهم من برة..بس من جوة..انسانيا “وده المقياس الاهم” الناس
دي احسن مننا.
الناس دي احسن مننا لدرجة اننا لو كنا عايشين في مجتمع سليم و مثالي..كان زمان
الطبقية هتبقي في نظرتهم هما لينا..مش العكس!
